Por orde, decreto e mandato do nosso Gurú desde O Mais Alá, Nosso Roi
Xordo Perpétuo D.Manuel María e Fernández Teixeiro, venho a convocar á nossa
grei ao anual “Magosto Com Mozas”, celebrando o equinoccio do Outono,
celebrando que estamos vivos no mes dos mortos, e celebrando que temos vontade
de celebralo
E cumplindo co mandato de que no “Sam Martinho prova o teu vinho” provaremos
e comprovaremos ali o milagro da transustanciación da glucosa em gloriosos
caldos e aromas, e como o “Mundo é Harmonía e Concerto Pitagórico”
os acompanharemos de boas castanhas e melhores pitanzas e mantenzas, que bem o
merecemos.
Juntaremo-nos no Parador
do Mosteiro de Santo Estevo, em Luintra a
27 kilómetros de Ourense, o dia 14 de Novembro as 11,30 horas.
E seguindo o Rito instaurado na nossa Irmandade desde tempos Imemoriais, teremos
primeiro um Magosto de Castanhas Assadas e Cozidas numha carvalheira ao lado se
nom chove, e logo umha cata-prova comentada e celebrada de vinhos maiormente
Tintos. Passaremos á Igreja, para rezar polos Nossos Irmandinhos
aguardando por nos no Mais Alá, e rogándo-lhes muita paciência para muito nos
aguardar, passando depois a umha boa papatória servida com carinho e
profissionalidade polo Parador e a sua gente boa.
Todo isto, pagando na entrada, na recepción, tanto mozos como mozas, pois
“nullus gratuitum prandium”, que nom fai falta traduzir, pois entende-se que
cada um paga o seu, ou se insistir, pode pagar tamén o dos outros.
Ali veremo-nos e comunicade quantos vamos ser, que ja está bem de aparecer ou
desaparecer, assim que informade se vades comparecer.
Umha aperta do Secretário que o é, para o que seja de escrever e de mandar, e
si som presuntos, melhor mandade dous.
Giuseppe Paussatta, ditto “Ubérrimo”